Iniciativa per krijimin e “Forumit të reporterëve të rinj për diversitetin”, synon t’i angazhojë të rinjtë në një qasje të përbashkët për ndërgjegjësimin e bashkëmoshatarëve dhe komunitetit të tyre në lidhje me diversitetin. Ky forum do të ndërtojë themelet e një strukture të qëndrueshme ku të rinjtë vullnetarë nga Shqipëria dhe Kosova, do të kenë hapësirën e domosdoshme për tu bërë promovues të tolerancës, dialogut dhe përfshirjes sociale, pa gjykime mbi baza raciste, homofobike, seksiste etj.

Risia e kësaj iniciative është se të rinjtë do t’i japin zë fenomeneve shoqërore të cilat lidhen me diversitetin, duke i vendosur ata në rolin e reporterit qytetar. Duke konsideruar faktin që teknologjia sot përdoret masivisht nga të rinjtë dhe jo vetëm, ky projekt synon që ata ta shfrytëzojnë atë, për të ndikuar në sensibilizimin e komunitetit për çështje të lidhura me diversitetin. Nëpërmjet një platforme dixhitale online, të rinjtë e forumit, pasi të aftësohen dhe informohen në këtë drejtim, do të pasqyrojnë dhe raportojnë informacione që frymëzojnë gjithëpërfshirjen dhe barazinë për të gjithë.